Giubileum da 100 onns
L'onn 2014 festivescha il Parc Naziunal Svizzer (PNS) ses 100avel giubileum. Cun la fundaziun dal parc il 1914 – sco emprim parc naziunal en las Alps – han ils piuniers da la protecziun da la natira da lez temp vulì surlaschar in toc cuntrada muntagnarda svizra dal tuttafatg al svilup natiral e perscrutar las midadas resultadas. Da quest experiment è provegnì in dals «laboratoris al liber» ils pli impurtants, in areal da referenza per la perscrutaziun scientifica.
Il cumenzament dal segund tschientaner dal PNS è in eveniment spezial che duai era vegnir festivà correspundentamain. Per quest intent s'occupa intensivamain in comité d'organisaziun cun la planisaziun e la realisaziun da las activitads da l'onn da giubileum. Sustegnì vegn quel d'in comité da patrunadi che procura, sut la direcziun da la cussegliera federala Doris Leuthard, per in grond sustegn dal project.
Ina seria d'occurrenzas ed activitads procura per ina partenza cun schlantsch en il segund tschientaner dal PNS. Il giubileum vegn a svegliar in interess naziunal ed a dar numerus impuls en la regiun dal parc.
- Festa principala il 1. d'avust 2014 a Zernez cun emissiun directa en l'entira Svizra
- Gieus al liber il fanadur ed avust 2014 a Zernez
- Occurrenzas regiunalas en l'Engiadina e la Val Müstair
- Turnea d'exposiziun naziunala en ils pli gronds centers da cumpras
- Products sco l'atlas dal PNS, publicaziuns scientificas, exposiziuns spezialas, congress da l'Academia da scienzas natiralas Svizra
Ulteriuras infurmaziuns (per tudestg)
