Alloschi
La Chamanna Cluozza è situada amez la selvadia Val Cluozza. La chamona fabritgada da laina radunda sa chatta sin 1882 m s.m. e datescha da l’onn 1910. Il 1993 e 2021 è ella vegnida renovada cumplettamain e porscha oz plaz a 61 persunas. La Chamanna Cluozza es l’unica tegia chi vegn cultivada en il Parc Naziunal. Ella porscha in albiert simpel e patgific in stanzas o champs da matratscha. La chamona è in punct da partenza ideal per spassegiadas en la Val Cluozza, l’emprima val che la vischnanca da Zernez ha mess a disposiziun gia l’onn 1909 al Parc Naziunal. Davent da Zernez dura la tura fin a la chamona 3,5 uras (ruta 7). La Chamanna Cluozza è averta a partir da mez zercladur enfin mez october.
A la via dal Pass dal Fuorn sa chatta il segund alloschi en il Parc Naziunal: l’hotel Parc Naziunal Il Fuorn. L’unic hotel en il Parc Naziunal cun sia atmosfera speziala da la fin dal 19avel tschientaner è in punct da partenza excellent per differentas turas.
En il conturn dal Parc Naziunal avais Vus ina gronda schelta da pussaivladads da pernottar.
A partir da trais pernottaziuns survegnis Vus en singuls hotels differents avantatgs per Voss viadi cun il traffic public. As infurmai per plaschair sin la pagina d’internet davart purschidas spezialas turisticas.
Viadi
Vus cuntanschais il Parc Naziunal senza difficultads cun ils meds da transport publics e l’auto privat. En il senn da la protecziun da la natira As recumandain nus da viagiar cun trens e bus. Uschia sa dattan ultra da quai er interessantas turas cun differents puncts da partenza e d’arriv.
Per lung da la via dal Pass dal Fuorn dastgan autos da persunas parcar mo sin ils parcadis uffizials P1 fin P10.
Nus As recumandain da studegiar nossa carta d’arrivada.
Il Parc Naziunal s’extenda sur ils territoris da l’Engiadina Bassa e da l’Engiadin’Ota sco er en la Val Müstair. La via dal Pass dal Fuorn maina tras il parc. Ils puncts da partenza da las spassegiadas èn per regla cuntanschibels cun l’auto. A Scuol stattan a disposiziun vehichels dal Carsharing. Lung la via dal Pass dal Fuorn datti parcadis (P1 fin P10 – il dumber da parcadis è limità). Nus As recumandain da far diever da viafier e da bus.
Arrivada Val Trupchun: Cun l’express Parc Naziunel (Alpintrans) fin a la chamona Varusch a l’entrada da la Val Trupchun u cun il bus d’Engiadina (lingia 7) fin al parcadi Prasüras, fermada S-chanf Parc Naziunal.