En il Parc Naziunal datti strusch stgets guauds da pigns.
Il Parc Naziunal è ina da las regiuns da las Alps cun ils pli paucs pigns. Zonas be da pigns èn fitg raras. Sin las spundas sumbrivaunas da la val principala da l’Engiadina chatt’ins percunter blers guauds maschadads da lareschs e pigns e guauds unicamain da pigns.
En lieus cun blera naiv creschan ils pigns en ina furma satiglia cun roma curta, per exempel al sid da la Punt Praspöl. Talas furmas da creschientscha chatt’ins per il solit plitost en il nord. Grazia a questa adattaziun resta damain naiv sin la roma.
Il pign crescha spert e guliv e perquai al prefereschan ils selviculturs sco lain da diever. Il pign ha ina scorsa brin cotschna, cuntrari a l’aviez ch’ha ina scorsa alva.
ls pignols dovran, cuntrari als tieus alpins ed als lareschs, pauca glisch per schermigliar e crescher.
En in guaud da muntogna cumpact sco quel al Plan Praspöl (ruta 8) creschan giuvens pigns e schembers meglier che lareschs e tieus alpins che dovran blera glisch. Lur creschientscha vegn disturbada en tscherts lieus da gronds donns da rusignar da la selvaschina.
La guglias dals pigns èn verdas durant tut l’onn. Vi da l’entir romin creschan singulas guglias che crodan pir suenter var 6 onns. En las puschas pendentas madiran ils sems ch’il vent sparpaglia l’atun. Lura crodan las puschas per terra.