Chaltschina da l'Allgäu

La chaltschina da l’Allgäu è sa furmada avant 150 milliuns onns en las profunditads d’in ocean.

Tranter l’Europa e l’Africa è s’averta da quel temp ina sort da Mar Mediterrana primara – l’ocean dal Tethys. Sias spundas eran per part fitg instabilas. Da temp en temp sa statgavan bovas sut l’aua e stiravan cun ellas material en las profunditads.

Las rasadas cleras èn ritgas da chaltschina. Ellas èn sa furmadas tras la sedimentaziun da chaltschina – però en fasas quietas e sur in lung temp. Las rasadas stgiras e ritgas d’arschiglia percunter èn sa furmadas entaifer paucas uras, numnadamain tras ina bova sutmarina che ha leventà blera glitta e ch’è sedimentada pli tard en il fund da la mar en ina nova rasada.

Quests craps da chaltschina ritgs d’arschiglia domineschan las spundas da la Val Trupchun. Els procuran per in terren fritgaivel ed èn er in motiv per il grond dumber da tschiervs e capricorns en la Val Trupchun.