Corniola

La corniola è ina maschaida da dolomit e da gip.

La corniola vegn era numnada dolomit da cellas. Il crap consista d’in dolomit cun spazis vids ch’èn sa furmads tras l’erosiun da gip solvibel. Il gip è damai svanì per la gronda part, enavos èn restads ils spazis vids u las cellas. Pervi da questas foras è il crap fitg permeabel.

Ils miniers han tema dal dolomit da cellas. Ils craps èn saturads dad aua e sch’ins als perfora, squitta l’aua cun gronda pressiun en la galaria.

En il Parc Naziunal ves’ins fitg bain las rasadas melnas da la corniola, per exempel si Margunet.

Il gip è in material che sa lascha furmar fitg bain. Tar la faudaziun da las Alps hai dà bleras ruttadiras inversas en zonas cun rasadas da gip. Cura ch’ils pachets da crappa sa stuschavan in sur l’auter, avevan las rasadas da gip ina funcziun da grass d’unscher. Lung questas zonas da glischnera vegniva la crappa rutta e transfurmada en ina maschaida da dolomit e da gip.