La stad porscha numerusas pussaivladads da spassegiar e far turas ed ina varietad incumparabla da plantas.
Ils mais da fanadur e d’avust èn il temp ideal per visitar il Parc Naziunal. Tut las sendas èn accessiblas, ils dis èn lungs e las temperaturas per il solit empernaivlas. Las plantas en flur e las tgirallas che sgulatschan en l’aria èn in vaira daletg per ils egls. Ils mais da stad fanadur ed avust avran las plantas lur flurs er en regiuns pli autas.
En territoris tranter 2000 e 3000 m s.m. flureschan la segunda mesadad da fanadur las pli bleras plantas cun flur. En l’auta muntogna po il temp da fluriziun sa retardar tenor las relaziuns da naiv fin vi en il mais d’avust. Il temp da fluriziun principal sa sposta tut tenor l’aura per 2 fin 3 emnas.
Turas panoramicas
La fin da fanadur pudais Vus far cun l’equipament adequat turas fin en las regiuns las pli autas dal Parc Naziunal. Il punct il pli aut entaifer il Parc è il Piz Quattervals da 3165 m s.m. L’ascensiun è reservada ad alpinists experimentads.
Tschiervs, chamutschs e capricorns sa retiran la stad en regiuns pli autas e pli frestgas. L’activitad dals animals sa sposta sin la damaun e la saira, cura che l’intensitad dal sulegl è main ferma.
