Infurmar

Las spassegiadas tras il Parc Naziunal permettan da scuvrir la natira cun tut ils senns. Ina visita en il Center dal Parc porscha numerusas infurmaziuns interessantas per chapir meglier la natira.

Viandar tras la natira intacta, observar muntanellas sin curta distanza, admirar stailalvas a l’ur da la senda, guardar sch’ins vesa in tschess-barbet, discutar cun in guardian dal parc: quai èn eveniments che stattan en buna regurdientscha.

Cun sia lavur d’infurmaziun multifara vul il PNS render pli enconuschent als giasts la natira e ses process cumplexs e gudagnar partenaris per la protecziun da quella.

Excursiuns guidadas, sendas ecologicas, curs da perfecziunament per scolastas e scolasts, offertas per uffants, referats, exposiziuns, in guid da viandar digital e numerusas publicaziuns èn ils elements centrals dal program da l’educaziun ambientala dal PNS.

Il Center dal Parc a Zernez porscha numerusas offertas interactivas che permettan da far experientschas multifaras. Uschia è el per pitschen e grond in lieu ideal per cumenzar u terminar ina spassegiada.