Exposiziun da l'urs

Il maletg che la societad fa da l’urs è en emprima lingia quel dad ursins da stoffa e d’istorgias dad urs.

Davart ils spazis da viver ch’in “vair” urs dovra e da ses cumportament san ins relativamain pauc. L’exposiziun vul surtut cuntanscher il public giuven e dar in maletg viv da l’urs. Perquai avain nus mess l’accent sin la communicaziun sur ils senns e sin l’eveniment. Ils texts sin las tavlas èn fitg curts e simpels, infurmaziuns supplementaras chattais Vus en la broschura detagliada.

En la part istorica da l’exposiziun stat il davos urs da la Svizra sajettà il 1904 da Jon Sarott Bischoff e Padruot Fried. Ina trapla dad urs en grondezza originala mussa cun tge instruments brutals ch’ils urs vegnivan persequitads pli baud.

La part actuala da l’exposiziun da l’urs mussa tge ch’ils urs brins pretendan da lur spazi da viver e co che las populaziuns dad urs sa derasan en Europa.

L’exposiziun vegn actualisada mintg’onn per tegnair quint dals svilups en Svizra ed en ils pajais cunfinants. Il museum Schmelzra serva er al Parc Naziunal sco post decentral d’infurmaziun che cuntegna in sistem d’infurmaziun digital per ils visitaders, ina staziun da video ed ina butia.

L’exposiziun è vegnida premiada il 1999 cun il Prix Media. Segund la giuria persvada l’exposiziun tras sia pussaivladad da far experientscha e tras sia qualitad pedagogica. Las infurmaziuns curtas e simplas da chapir èn scrittas en tudestg e rumantsch. Igl èn er avant maun texts franzos, talians ed englais.