L’evla è mitschada malapaina da vegnir extirpada.
Oriundamain era ella derasada en l’entira Europa Centrala. Persequitada da l’uman, era l’effectiv a l’entschatta dal 20avel tschientaner sin in nivel fitg bass. Ina protecziun severa ha salvà l’evla da l’extirpaziun.
2.2 m ladas èn las alas avertas da l’evla – pelvaira impressiunant betg mo per las muntanellas!
Il «retg da l’aria» profitescha en il Parc Naziunal da cundiziuns da viver idealas. L’evla chatta qua animals da preda e plazs da gnivar en abundanza. La stad sa nutrescha ella surtut da muntanellas. L’enviern è la gronda part da sia vivonda cadavers d’animals ad ungla.
Oz vivan en il Parc Naziunal sis pèrs d’evla.
La copulaziun da l’evla ha lieu il schaner, ils ovs metta ella l’avrigl. Ils pitschens sortan da l’ov il matg e sgolan ora vers la fin da fanadur. Enfin l’enviern vegnan els pavlads da lur geniturs. Las evlas han per il solit in fin dus pitschens. Savens bittan ils utschellins in fragliun flaivel or dal gnieu.
Las evlas èn ordvart fidaivlas a lur territori.
Mintga pèr ha per il solit plirs gnieus entaifer ses revier. En il chantun Grischun han ils reviers en media ina grondezza da 50 kilometers quadrat. Evlas estras vegnan scurrentadas cun tutta vehemenza dal revier. Dapli da l’evla pudais Vus leger en il cudesch «Der Steinadler in Graubünden» dal directur dal Parc Naziunal Heinrich Haller. Vus pudais empustar il cudesch en il Center dal Parc ubain sur nossa Butia.
Oz n’ha l’evla nagins inimis natirals pli. Tuttina na pon las colonias d’evlas betg crescher senza impediments. Pli bleras evlas che sgulatschan en l’aria e pli gronda ch’è la concurrenza tranter ellas. Sch’in pèr sto bandunar trasor il gnieu per defender ses revier, negligescha el ses cuaditsch. Resultats da perscrutaziun cumprovan ch’il success dals cuaditschs sa sbassa cun l’augment dals reviers.