Ils tieus alpins domineschan vastas parts dal guaud en il Parc Naziunal.
Il tieu alpin è la spezia la pli frequenta en la regiun dal Pass dal Fuorn. Nus pudain differenziar 2 geners da tieus: il tieu en pe ed il tieu per terra (il zunder). Ils sems dal tieu vegnan derasads dal vent e schermiglian era sin terrens sitgs e crappus. Il tieu è l’emprima spezia da plantas che ha prendì possess da quest territori, suenter in tagl cumplet en il tschientaner passà.
Il tieu alpin flurescha il zercladur. Cuntrari al schember ha il tieu alpin duas guglias curtas e diras en in tschof.
Il zunder ed il tieu alpin en pe èn differents en lur furma, lur puschas e lur spazis da viver. En il Parc Naziunal sa cruschan ils territoris da derasaziun dal tieu en pe (Alps occidentalas) e dal tieu per terra, il zunder, (Alps orientalas). Qua tras datti ina gronda varietad da furmas. Tieus per terra sa drizzan tuttenina a dretg si e surpiglian la furma dals tieus alpins en pe.
Il tieu alpin en pe furma en il Parc Naziunal ils vasts guauds da tieus alpins cun erica. Lur caracteristica è la roma sturschida sco in crutsch; qua tras als pon ins era differenziar dals schembers.
En la Val dal Botsch pon ins observar particularmain bain las differentas furmas da tieus alpins e lur cruschadas. Il tieu per terra, il zunder, crescha al cunfin dal guaud e sin spundas stippas.
