Sch’ins expona in granit a ferma pressiun ed ad autas temperaturas, sa mida el en in gnais.
Gnais è in crap da transfurmaziun. La cumposiziun è bain la medema sco quella dal granit, ma la structura è differenta. Tar il granit stattan ils minerals, il quarz, il feldspat e la mica a crusch e travers, tar il gnais èn els ordinads parallelamain. Questa ordinaziun succeda tar la furmaziun da la muntogna: ils minerals sa volvan sin fundament da la pressiun e sa mettan en parallela. Uschia sa furman strivlas en il crap che vegnan numnadas sfegliaziun. Lung questa sfegliaziun rumpa il gnais en plattas.
En quest gnais a Macun è la sfegliaziun bain vesaivla. Las strivlas parallelas stattan en direcziun verticala cun l’anteriura pressiun. Ils gnais èn ils pli vegls craps da la regiun.