Terrens ruschnants

Ils currents da terra èn las furmas las pli spectacularas en las autas muntognas. Lur lieungas sa stendan sur entiras spundas.

Quests ‘daguts’ sa furman cura ch’il terren sa sdreglia, s’emplenescha cun aua e sa ruschna aval sin il fund schelà. Cuntrari als glatschers cumpacts n’èn ils currents da terra betg liads stringentamain a la schelira permanenta. Els èn fitg frequents en il Parc Naziunal en autezzas da 2300 fin 2700 m s.m.

Currents da terra activs sa movan mintg’onn insaquants centimeters aval, tut tenor la pendenza da la spunda. Currents da terra inactivs èn cuverts pli ferm da vegetaziun ch’ils activs.

En la regiun tranter Munt Buffalora e Munt la Schera (ruta 15) exista in grond dumber da currents da terra per part activs. Qua perscruteschan ils experts era quests elements particulars da la cuntrada.