Il verrucano è la gera d’erosiun da quella muntogna ch’è sa furmada e danovamain sa defurmada ditg avant las Alps.
Forsa enconuschais Vus il crap squitschà che consista da gera groppa. Cura che las Alps èn sa furmadas, ha il process d’erosiun immediat puspè cumenzà a defurmar la giuvna muntogna. Ils auals e flums han alura purta il material a l’ur da las Alps, nua ch’el è vegnì deposità ed è s’endirì a crap squitschà. Er il verrucano è sa furmà en sumeglianta maniera, però 200 milliuns onns pli baud. La muntogna da lez temp variszica è vegnida defurmada – sco oz las Alps – tras erosiun, ed il material è vegnì purtà davent dals flums e deponì en lieus pli bass.
Il verrucano consista da crappugls e grauns da sablun endirids. La colur cotschna deriva dal cuntegn bass da fier.
Las parts alvas èn surtut quarz d’anteriurs crappugls e grauns da sablun. Tgi che suonda l’aual da l’hotel Parc Naziunal Il Fuorn amunt, inscuntra sin via adina puspè scoluradas violettas per terra. Quellas derivan dal verrucano. Ils pli marcants èn ils blocs da verrucano a l’entschatta da la Val Trupchun: els sa chattan en il letg dal flum a mesa via tranter la plazza da parcar Prasüras e la chamona Varusch.